O artista Doctor Toy homenaxea á vila de Noia na prolongación do mural do IES Virxe do Mar

Este mes de agosto déuselle continuidade ao mural do IES Virxe do Mar (Noia), do que informamos a comezos de xullo, poñendo o foco no éxito que estaba a ter a proposta como iniciativa de posta en valor do inmóbel, a nivel particular, e de fórmula creativa contra o feísmo que afecta ás nosas vilas, a nivel xeral. A prolongación do mural, unha homenaxe a algúns dos máis senlleiros edificios da localidade noiesa, veu a da man do artista de Vella Escola, Doctor Toy.

O Concello de Noia, co-responsábel deste proxecto xunto coa dirección do IES e as e os artistas integrantes de Vella Escola, felicitou ao artista polos resultados obtidos e sinalou que “con esta actuación preténdese dar unha maior vistosidade á fachada do inmóbel e, así, eliminar as pintadas que se viñan producindo”.

No que respecta aos traballos previos focalizáronse na fachada posterior, na vertente que dá á rúa Besteiros.

Segundo indicaron os responsábeis deste gran mural que está a recubrir boa parte do centro educativo (a idea básica é facer unha intervención no seu conxunto), non só se conseguiu unha importante mellora visual neste enclave de Noia, senón que se creou un claro referente ou modelo a seguir para outros proxectos análogos de mellora urbana, tanto na dita localidade como noutras vilas e cidades.