Novo recoñecemento ao arquitecto Manuel Gallego Jorreto

O arquitecto galego Manuel Gallego Jorreto, cuxa destacada carreira irá para sempre ligada á parroquia de Corrubedo (onde deu un impulso definitivo ao seu recoñecemento nacional e internacional coa construción da casa unifamiliar con vistas á praia da Ladeira e a badía do Vilar e Couso), recibiu este 13 de agosto en Cambados un novo recoñecemento ás súas importantes contribucións artísticas, construtivas e urbanísticas.

Veu da man da Fundación Manolo Paz Arte Contemporánea no transcurso da sexta edición das súas xornadas. A figura de Gallego Jorreto foi enxalzada polo presidente da Xunta, Alberto Núñez Feijóo, quen o cualificou de “referencia indiscutíbel” e salientou “que a paisaxe urbana da Galicia actual lle debe moito a profesionais coma el”.

“Gallego Jorreto é todo un exemplo a seguir”, dixo o presidente, incidindo na coherencia das súas propostas, na súa entrega profesional, na súa natureza reflexiva, na súa preocupación polo papel social da arquitectura ou pola vontade de adaptación ás necesidades das persoas ou institucións ás que vai dirixida a súa obra.

O arquitecto homenaxeado

Manuel Gallego Jorreto, natural do Carballiño, comezou a súa máis que destacada carreira en Corrubedo (Ribeira), a cabalo entre o ano 1969 e o 1970. A súa contribución ao modelo de casa unifamiliar, inserida nos terreos lindeiros á praia da Ladeira (no outeiro que permite a visión das dunas, do Vilar e do Atlántico), foi destacada por múltiples especialistas en arquitectura como un exemplo perfecto de harmonía arquitectónica co medio natural. Segundo fixo saber nunha entrevista recente o propio homenaxeado, “a nosa casa de Corrubedo estaba nun sitio marabilloso e é, sen dúbida, o máis rotundo dos meus edificios, é case unha ferramenta, un periscopio que ergue a cabeza para mirar, que varre o vento por detrás”.