Leirabuxo recala en Noia o 21 de agosto na praza do Curro

A agrupación Leirabuxo, con sede en Melide, estará o vindeiro 21 de agosto en Noia coincidindo coa celebración da iniciativa Pon un Sancosmeiro. Será ás 21.30 horas na praza do Curro.

O concerto, unha das actividades estrelas do programa da dita festividade (que este ano, se ben non é tan completo coma noutras edicións, por mor da pandemia, promete ser novamente unha destacada exaltación da cultura tradicional e local), vén da man da Concellería de Cultura de Noia, que lanzou un convite aos veciños e veciñas para que acompañen as celebracións sacando á rúa cadanseus traxes tradicionais. O concerto terá o aforo limitado e as prazas cómpre reservalas a través de culturaconcellodenoia@gmail.com indicando nome, DNI e teléfono de contacto (máximo dous convites por persoa).

Sobre Leirabuxo

Leirabuxo é un proxecto musical que xorde no berce da bisbarra de Melide (A Coruña) e arredores en 2010, froito dunha xuntanza de catro amigos amantes da música tradicional e, concretamente, das posibilidades creativas e artísticas que xorden dun material singular con forte significado na nosa terra: o pau de buxo.

Nos seus comezos, o proxecto estaba composto por Manuel Varela (acordeón), Román Varela (tamboril), Carlos “Pulgui” Varela (bombo), e Carlos Fandiño (gaita); posteriormente incorporáronse X. Luis Barreiro (gaita), David Fernández (saxofón barítono) e as voces de Carla e Lía Rey.

En 2014 gravan e editan o seu primeiro traballo discográfico, que sae ao mercado baixo o título Pé de ouro, raíces de prata (2014).

Nestes case oito anos de existencia, Leirabuxo xa participou en múltiples festivais, tales como o Festival de Pardiñas, Festival de la Luz, Son do Masma, Festival do Melindre e outros moitos eventos e festas. En 2018 sae o segundo traballo discográfico, Minimum.