O Concello da Pobra informou de que este mes de agosto aínda é posíbel desfrutar das viaxes en veleiro pola ría da Arousa a bordo do Mascato, singraduras impulsadas pola Concellaría do Turismo da cal é titular a edil Charo Varela (Nós Pobra). Achéganse “como unha alternativa para coñecer o patrimonio medioambiental, marítimo e paisaxístico costeiro”.
As excursións iniciáronse no mes de xullo e rematarán no penúltimo domingo de agosto, polo que as persoas interesadas en sumarse a esta actividade dispoñen de dúas fins de semana para facelo, concretamente, nos días 13, 14, 15, 20, 21 e 22.
A duración do traxecto é de hora e media e as saídas establécense en quendas de mañá e de tarde. O prezo estipúlase en 15 euros para as persoas adultas e 10 euros para nenos e nenas menores de 12 anos, ofrecendo un desconto para as familias. Cómpre indicar que as travesías transcorrerán seguindo as medidas implantadas por mor da COVID-19.
A cabida máxima do veleiro é de 10 persoas, razón pola cal é preciso formalizar a reserva e compra previa do tícket no punto de información turística (situado na Casa Mariñeira), no enderezo electrónico turismo@apobra.gal ou nos teléfonos de contacto 671090262 e 687482835. Tamén está a disposición das persoas interesadas a páxina web de Turismo da Pobra para máis información.
