A sétima edición da Festa do Polbo de Palmeira vén de abrir as súas portas e xa se rexistra un grande ambiente na carpa instalada na zona portuaria da localidade.
Así, baixo os acordes da charanga Os Santiaguiños de Padrón, os primeiros comensais foron enchendo o recinto para degustar o cefalópodo, preparado polo pulpeiro Manuel Veloso. A diferenza de anos anteriores, non hai mesas corridas senón outras máis pequenas para grupos reducidos coa fin de adaptarse á normativa anticovid.
Pregón
Cómpre lembrar que o pregón está previsto para as oito da tarde do e será pronunciado polo maxistrado do Tribunal Supremo José Alberto Fernández Rodera. Antes e despois desta intervención actuará a cantante Thais Suki, en tanto que a partir das 21.30 horas será o turno de Os Bugis no marco da programación das Rúas Musicais.
En canto a mañá domingo, a partir das 21 horas terá lugar a gala Camiño das Estrelas que tanto éxito tivera o verán pasado en Aguiño e que nesta ocasión contará coas actuacións de As Voces do Camiño (entre as mesmas, a da ribeirense Ana Paz), a acróbata Juliette, o mago David Maestro e os bailaríns de Grow As Ohana. A entrada é libre ata completar aforo.
A cita está organizada polo Concello de Ribeira coa colaboración dos bares A de Alejandro, Baluarte e Manolo o do Café e a comisión de festas.
