En Palmeira Fernández Rodera salientou o papel do polbo na linguaxe coloquial e na literatura no pregón da Festa

Ante moitísima xente o maxistrado do Tribunal Supremo José Alberto Fernández Rodera deu na tarde de onte no recinto portuario de Palmeira o pregón da sétima Festa do Polbo da localidade.
O xuiz, fillo de palmeirán, foi introducido polo alcalde Manuel Ruiz, quen ademais de repasar a súa sobresaliente traxectoria no mundo da xudicatura, ensalzou a talla dos pregoeiros e pregoeiras que teñen pasado pola festa, con persoeiros como Enrique Paisal, Pemón Bouzas, José Ramón González, Yago Iglesias, Manuela Gago e Álex Vidal.
A continuación, Fernández Rodera manifestou que é unha honra e unha emoción poder falar no pobo do seu pai, “que yo considero que es mío también”, ademais de aplaudir que dende fai pouco chegue ata o lugar do evento o paseo Plácido Betanzos, moi amigo e querido.
Tocante ás cualidades do cefalópodo, o pregoeiro quixo destacar a súa contribución á linguaxe cotiá (con expresións como “le dieron las del pulpo”, “estoy como un pulpo en un garaje”…), así como o seu papel na literatura (en obras como “Os traballadores do mar” de Víctor Hugo e “Vinte mil leguas de viaxe submariña” de Xulio Verne ou co kraken da mitoloxía nórdica). E tamén quixo facer referencia ao polbo Paul que prognosticou o campionato do mundo de fútbol gañado pola Selección Española.
O maxistrado concluíu a súa intervención cun “viva o polbo e viva Palmeira”.
Xornada do domingo
Hoxe domingo, o mediodía estivo amenizado pola charanga Os Santiaguiños de Padrón mentres que a partir das 21 horas terá lugar a gala Camiño das Estrelas que tanto éxito tivera o verán pasado en Aguiño e que nesta ocasión contará coas actuacións de As Voces do Camiño (entre as mesmas, a da ribeirense Ana Paz), a acróbata Juliette, o mago David Maestro e os bailaríns de Grow As Ohana. A entrada é libre ata completar aforo.
A cita está organizada polo Concello de Ribeira coa colaboración dos bares A de Alejandro, Baluarte e Manolo do Café e a comisión de festas.