As organizacións sindicais CIG, CCOO, CSIF e UGT denunciaron ante a Consellería de Medio Ambiente, Territorio e Vivenda, as condicións de precariedade laboral nas que, segundo indican estas plataformas, desenvolve o seu labor o persoal empregado público que presta servizo no Parque Natural das Illas Atlánticas. Reivindícase “urxentemente” a apertura dunha negociación.
Este requirimento pon o foco nas 25 persoas empregadas públicas, entre persoal funcionario e laboral (axentes, vixilantes, guías e tripulación), que prestan servizo os 365 días ao ano nas illas Cíes, Ons, Sálvora e Cortegada, que, segundo lembran as organizacións, “están a día de hoxe en loita pola regulación das súas condicións laborais xa que se atopan nun limbo dende a transferencia deste espazo natural protexido do Estado español á Xunta de Galiza no 2008”.
Nas súas reclamacións indican que “a Consellería de Medio Ambiente, Territorio e Vivenda mantén o servizo as 24 horas do día os 365 días do ano cun cadro de persoal raquítico e sen un acordo de condicións de traballo que regule a súa situación singular; para máis as empresas e contratas das que tira a Xunta de Galicia no verán para obras e actuacións, nas que os traballadores teñen condicións aínda peores, comparten co persoal empregado público espazos e penosidades tirando da solidariedade e da vontade do persoal propio e a espera dun regulamento de coordinación das actividades empresariais nas illas e da delimitación de espazos e responsabilidades que nunca chega”.
