O ciclo Vilancicos de Galegos chega este venres a San Martiño de Noia cun concerto de Vox Stellae

A Igrexa de San Martiño de Noia será este 30 de xullo o escenario dun concerto do ciclo Vilancicos de Galegos, a cargo do do coro Vox Stellae. A actividade, prevista para as 21:15 horas, encádrese nun proxecto cultural (o devandito ciclo) organizado pola Fundación Araguaney-Puente de Culturas, a Secretaría Xeral de Política Lingüística da Xunta de Galicia e o coro Vox Stellae. Abéirase ao Fondo de proxectos Xacobeo 21-22 da Consellería de Cultura e Educación.

O ciclo constará de dous concertos, ambos en templos especialmente relevantes de diferentes rutas do Camiño de Santiago, co obxecto de difundir contidos en lingua galega, o patrimonio cultural e as rutas de peregrinación xacobeas. Celebrarase o primeiro concerto en Noia, este venres 30 de xullo, ás 21:15 horas na Igrexa de San Martiño de Noia. Para asistir é preciso solicitar invitación desde o 19 de xullo ata o día 30 ás 12 horas no correo programacionconcellodenoia@gmail.com. As persoas interesadas poderán solicitar dúas invitacións por persoa.

O coro Vox Stellae nunha imaxe de Maia Rey

O programa do concerto está composto por 13 pezas, divididas en tres grupos temáticos segundo criterios musicolóxicos: dúas obras que non son propiamente vilancicos de galegos, senón obras de cancioneiros ibéricos dos séculos XVI e XVII; cuatro pezas chegadas de América; e sete vilancicos de galegos creados para catedrais españolas como Valladolid, Lleida, Valencia, Salamanca ou Zaragoza.