O BNG da Pobra recollerá sinaturas este sábado contra a suba da luz

Este sábado 10 de xullo a partir das 11 da mañá a agrupación do Bloque Nacionalista Galego da Pobra inicia unha campaña encontra da suba do recibo da luz. Ese día os representantes locais do BNG estarán na alameda recollendo sinaturas en contra desta subida das tarifas eléctricas. Amais, en vindeiros días anunciarán novas actuacións.

Esta campaña súmase ás que se están a realizar noutros concellos da nosa comarca polos grupos locais do BNG, como por exemplo en Ribeira e máis en Boiro, onde se recolleron centos de sinaturas das veciñas e veciños.

A agrupación lembra que é inadmisíbel a escalada do recibo da enerxía eléctrica e como este feito está a afectar negativamente á nosa cidadanía e máis ás empresas, que pagan cada vez máis polo servizo, malia ser Galicia unha das principais fontes de electricidade de España.

O BNG defende a intervención pública no sector enerxético e, para este obxectivo, xa puxo sobre a mesa medidas concretas. A redución do IVE da luz ao 4% fronte ao 21%, unha tarifa eléctrica galega e a creación dunha empresa pública galega de enerxía son tres das claves para facer posíbel esta proposta, apuntan dende o BNG.