A Fundación Araguaney-Puente de Culturas, a Secretaría Xeral de Política Lingüística da Xunta de Galicia e o coro Vox Stellae presentaron este 20 de xullo o ciclo de concertos Vilancicos de Galegos, proxecto realizado ao abeiro do Fondo de proxectos Xacobeo 21-22 da Consellería de Cultura e Educación (Secretaría de Política Lingüística). Colaboran nesta acción os Concellos de Noia e Muxía. Trátase de reivindicar e mostrar pezas escritas na nosa lingua, ligadas ao Nadal e feitas por compositores foráneos nos séculos XVII e XVIII, onde os galegos son os protagonistas.
Á rolda de prensa, que se celebrou no hotel Eurostars Araguaney de Santiago, asistiron o presidente de honra da Fundación Araguaney-Puente de Culturas, Ghaleb Jaber Ibrahim; o secretario xeral de Cultura da Xunta de Galicia, Anxo Lorenzo; o director de Vox Stellae, Luís Martínez; e o concelleiro de Cultura do Concello de Noia, José Pérez.
O ciclo consta de dous concertos en “templos especialmente relevantes de diferentes rutas do Camiño de Santiago”, explicouse na rolda de prensa, engadíndose que o obxectivo é “difundir contidos en lingua galega, o patrimonio cultural e as rutas de peregrinación xacobeas”.
Celebrarase o primeiro concerto en Noia, o venres 30 de xullo, ás 21:15 horas na Igrexa de San Martiño de Noia. Para asistir é preciso solicitar invitación desde o 19 de xullo ata o día 30 ás 12 horas no correo electrónico programacionconcellodenoia@gmail.com. Os interesados poderán solicitar dúas invitacións por persoa. O segundo concerto será en Muxía, o sábado 31 de xullo, ás 20:30 horas no Santuario da Virxe da Barca. A reserva de entradas farase por vía telefónica chamando ás oficinas municipais (981 742 001).
Para máis información, cómpre visitar a web da Fundación Araguaney.
