Os días pasados a rapazada participante no Campamento de Verán de Outes Concilia tivo a oportunidade de gozar dun paseo a bordo dunha embarcación histórica: o balandro Joaquín Vieta, que percorre cada verán a ría de Muros e Noia. As nenas e nenos embarcaron no porto de Freixo, que é onde se construíu, a comezos do século XX, o Joaquín Vieta.
O Campamento de Verán 2021 do Outes Concilia, impulsado pola Concellería de Igualdade e Benestar, comezou o pasado 23 de xuño e está dirixido a ofrecer alternativas saudábeis, lúdicas e de aprendizaxe á rapazada local durante esta tempada estival.
As actividades teñen o centro de operacións no CEIP Plurilingüe de Outes, aínda que o groso das accións está previsto que se desenvolvan ao aire libre, desfrutando da natureza. É o caso da singradura levada a cabo polos participantes a bordo do Joaquín Vieta, un histórico barco que pasa por ser o veleiro máis antigo de Galicia (foi construído na segunda década do século XX, entre o 1915 e o 1916, como dixemos nun estaleiro do Freixo, en Outes).