A ANPA Río Tines de Outes vén de anunciar unha concentración como medida de rexeitamento aos recortes previstos no centro ao que se adscribe a asociación de nais e pais, o CEIP Plurilingüe de Outes, orixinado da fusión en 2017 dos extintos CEIP Emilio de Navasqüés e CEIP Plurilingüe da Serra de Outes. A concentración, que se convoca baixo o epígrafe Por unha educación pública e de calidade, está prevista para este 8 de xullo ás 20.00 horas, na entrada do CEIP de Outes.
No comunicado a ANPA sinala que os recortes programados irían en contra do espírito que alentou a dita fusión colexios, un proceso no que a administración alegou razóns como a mellora da calidade educativa no concello e a de optimizar a atención á diversidade e ao alumnado con necesidades específicas de apoio educativo. “Ambos os dous argumentos baseábanse en que dado que ía contarse cun único centro de Infantil e Primaria o Departamento de Orientación e, polo tanto, os especialistas que o conforman, ían resultar ter carácter definitivo”, explica a ANPA, mostrando a súa preocupación porque este carácter definitivo deixe de selo: “Rexeitamos esta medida por considerar que aínda que nun futuro non se alcance o número mínimo de unidades esixíbeis na lexislación o noso centro encádrase na excepción que o aconsella por motivos de dispersión xeográfica”.
E engaden: “No mesmo sentido preocúpanos, e moito, o feito da posible perda dunha das coidadoras que ten asignada o centro para o coidado de alumno con necesidades educativas especiais, coidadoras que se adxudicaron tras o informe favorable no mes de setembro do organismo competente na materia”. A ANPA salienta a este respecto que “as circunstancias dos menores atendidos por estas profesionais non variou polo que se fai imprescindible que continúen como ata o momento o viñan facendo”.
