A Pobra do Caramiñal, xunto con outros 22 concellos socios do Fondo Galego de Cooperación e Solidariedade, unirase neste 5 de xuño a un apagamento convocado pola entidade con motivo do Día Mundial do Medio Ambiente.
Baixo esta premisa, a partir das 23.00 horas suspenderase a iluminación pública de consistorios, prazas, igrexas, torres e outros monumentos coa finalidade de concienciar sobre o consumo enerxético.
No caso concreto da Pobra, o edificio escolleito é a Casa do Concello.
A dita acción enmárcase no proxecto europeo People & Planet, que implica a mocidade e os gobernos locais na loita contra o cambio climático.
Dende o Fondo Galego salientan a importancia de fomentar o aforro de enerxía para evitar o impacto ambiental que supón producila e, polo tanto, protexer os ecosistemas, ámbito no cal se centra neste 2021 o Día Mundial do Medio Ambiente baixo o lema Reimaxina, rexenera, restaura.
O Concello da Pobra lembra que a proposta do apagamento é unhas das máis de 50 actividades que se impulsarán nos concellos socios dentro do mencionado proxecto People & Planet e búscase desta maneira contribuír a acadar os Obxectivos de Desenvolvemento Sostible fixados polas Nacións Unidas e, especialmente, os ODS 13: adoptar medidas urxentes para loitar contra o cambio climático e os seus efectos.
