O Cantón da Leña celebrará un mercado de artesanía local xuvenil o 3 de xullo, en horario de 10.00 a 13.30 e de 16.00 a 20.00 horas. Esta proposta nace da man dun grupo de mozas e mozos do municipio e conta coa colaboración do Concello da Pobra do Caramiñal.
En termos xerais, o mercado constitúe a primeira das actividades que se desenvolverán durante a tempada estival no ámbito xuvenil coa aspiración de que sexan unha constante ao longo do tempo. Preténdese “contribuír á posta en valor do talento da xente nova da localidade”.
De feito, entre os obxectivos figuran apoiar e buscar novas saídas aos proxectos xuvenís existentes na zona, así como dar saída ás creacións das persoas que decidan participar neste mercado de artesanía. Neste intre, hai anotados catro postos que ofrecerán pezas elaboradas con diversas técnicas artesanais: dende resina epoxi a fío encerado e macramé.
As prazas son limitadas. Por iso, aquelas mozas e mozos que desexen participar dispoñen ata o día 1 de xullo para inscribirse mediante o enderezo electrónico mocidade@apobra.gal.
