Este luns ao mediodía presentouse en Ribeira unha publicación local destinada a incrementar o interese de persoas de todas idades polo medio natural, a arte e a creación literaria. Estamos a falar do libro Paxarada, impulsado pola ANPA Santa Uxía do CEIP O Grupo de Ribeira e o propio centro educativo ribeirense co obxectivo complementario de mostrar a gran riqueza poética (e divulgadora) que xorde da confluencia entre as artes e o medio ambiente, obxectivo reforzado pola presenza de artistas locais tan sobranceiros como Manuel Ayaso (Aguiño, 1934) e a súa filla Mónica Ayaso Rivas, que proporcionaron os seus debuxos ao proxecto. O libro tamén contén fermosos poemas sobre paxaros realizados polo alumnado de Primaria do CEIP O Grupo e haikus escritos polos cativos de Infantil.
A publicación conxunta presentouse no pavillón do colexio ribeirense, coa presenza do equipo directivo con Nieves Lampón á súa cabeza, os coordinadores do proxecto (a mestra de infantil Sara Reiriz e o secretario da ANPA, Unai González) e a presidenta da ANPA, María Xosé Blanco, ademais de Ayaso e a súa filla Mónica, que entregaron parte dos 400 exemplares editados a arredor dun cento de nenos e nenas de primeiro e segundo curso de Primaria (exemplares que tamén chegarán ao resto das familias o derradeiro día de curso, este martes 22).
Asemade, deuse a coñecer unha edición dixital en PDF que será pendurada na web do centro educativo cunha ligazón ás redes sociais da ANPA. A publicación está en parte subvencionada pola Deputación da Coruña.
Na cita deste luns acudiu o alumnado de todos os cursos de primeiro a sexto, que, xunto co resto da comunidade educativa, conformaron un auditorio de preto de 300 persoas. As nenas e nenos do Grupo non quixeron deixar pasar a ocasión de expresar o seu agradecemento a Manuel e Mónica Ayaso, e, para mostralo, agasalláronlles un traballo artístico feito por eles para a ocasión máis un ramo de hortensias.
Pai e filla dirixíronse aos cativos mostrando a súa satisfacción polo proxecto e desexando que “de entre todo a alumnado saia algún artista que leve o nome de Ribeira e Galicia por todo o mundo”; tamén lles deron as grazas ao colexio, á ANPA e ao alumnado por “ter participado nesta fermosa actividade”. No transcurso do acto realizaron en situ un debuxo conxunto adicado ao colexio (que será enmarcado e colgado nas súas paredes) e entregaron un exemplar da publicación a cada neno e nena presentes dedicándollos persoalmente a moitos deles; realizaron tamén unha foto coa dirección do colexio e os membros da ANPA.
A orixe
Segundo se informou no acto deste luns, o proxecto xurdiu dende o colexio e contou coa colaboración da ANPA dende o primeiro momento, facendo posíbel unir literatura, paisaxe e coidado do medio natural coa arte da man das novas xeracións a un experimentado artista recoñecido a nivel internacional.
O proxecto xurdiu coa intención de darlle continuidade en vindeiros cursos con outros artistas. “Trátase dun libriño que mestura a ilusión e maxia literaria dos cativos co talento e a creatividade dun artista con maiúsculas como é Manuel Ayaso, nesta ocasión, acompañado da frescura dos debuxos da súa filla Mónica”, explicou Unai González na presentación celebrada este 21 de xuño.
