En Outes o Concello vén de denunciar novamente un exemplo de malos hábitos no que a tratamento do refugallos se refire. Dáse a circunstancia, desta volta, de que o caso de vertidos sen control que compartiu o Concello centrouse no Punto Limpo local, que foi empregado (é “un dicir”) por algún veciño para deixar todo tipo de lixo envorcado enriba do valado.
O Concello fixo saber que a Policía Local está a traballar nun atestado para clarificar o acontecido. O Goberno de Outes tamén fai un chamamento á veciñanza para relembrarlle a necesidade de evitar prexudicar o medio ambiente cos seus depósitos de lixo ou material de obra, senón tamén de facer un uso axeitado de servizos como os que ofrece o Punto Limpo.
