Comezaron en Outes as actividades do Campamento de Verán 2021

Este mércores 23 de xuño comezaron finalmente as actividades do Campamento de Verán 2021 do Outes Concilia, destinado a ofrecer alternativas saudábeis, lúdicas e de aprendizaxe á rapazada local durante esta tempada estival.

As actividades teñen o centro de operacións no CEIP Plurilingüe de Outes, aínda que o groso das accións está previsto que se desenvolvan ao aire libre, desfrutando da natureza. O campamento está dirixido as familias con menores de 3 anos (escolarizados) a 16 anos.

A iniciativa, impulsada pola Concellaría de Igualdade e Benestar que dirixe Raquel García, enmárcase na aposta do Concello pola conciliación e abranguerá desde o 23 de xuño ao 7 de setembro. “Está pensado ademais como unha actividade que combina actividades de aprendizaxe activo e lecer, prioritariamente ao aire libre”, sinalaba a edil na presentación do Campamento de Verán 2021, engadindo que a maiores “están previstas excursións e visitas polo concello” e, de feito prevese repetir a saída que o ano pasado fixeron os rapaces no barco Joaquín Vieta pola ría do Freixo.

Estas son as quendas previstas:

-1ª quenda: do 23 de xuño ao 2 de xullo

-2ª quenda: do 5 de xullo ao 16 de xullo

-3ª quenda: do 19 de xullo ao 30 de xullo

-4ª quenda: do 2 de agosto ao 13 agosto

-5ª quenda: do 16 de agosto ao 27 de agosto

-6ª quenda: do 30 de agosto ao 7 de setembro