A Pobra colaborará coa Asociación Galega de Familias de Acollida para fomentar o acollemento

O Concello da Pobra do Caramiñal establecerá un convenio de colaboración coa Asociación Galega de Familias de Acollida para fomentar a cultura de acollemento. Así, o día 29 de xuño, terá lugar a charla Contigo Florece, que se enmarcará nun conxunto de propostas cos obxectivos de actividades e programas de atención, formación e difusión sobre o sistema de protección de menores e, concretamente, das familias de acollida.

Desta forma, a presidenta de ACOUGO, Rebeca Pereira, explicou que “o obxectivo é achegar á sociedade a realidade das nenas, nenos e adolescentes en situación de desprotección e, a partir de aí, tratar coas familias acolledoras ou potencialmente acolledoras para ofrece-la preparación, a orientación, o acompañamento e o apoio para dotalas de competencias no manexo das dificultades e necesidades específicas das e dos menores acollidos”.

En definitiva, a charla realizarase no Auditorio do Museo Valle-Inclán, a partir das 20.00 horas. Cabe mencionar que se cumprirán, en todo momento, as medidas establecidas por mor da COVID-19, polo cal resulta preciso anotarse previamente a través do teléfono de contacto 981832764 ou no enderezo electrónico servizos.sociais@apobra.gal.