A Ecobrigada da Asociación Amicos comezou este 2 de xuño as tarefas para a rehabilitación do Xardín Botánico das Bodegas Granbazán.
O obxectivo deste traballo é por en valor este enclave de importancia ambiental e paisaxística para a realización de eventos ao aire libre e catas de enoturismo nas que se dean coñecer os viños que produce esta adega emprazada na comarca do Salnés.
Os responsábeis da explotación destacan a importante oportunidade que lles brindou Amicos para o aproveitamento do xardín: “Queremos que este sitio quede enmarcado polo gran labor social da Ecobrigada”, indicaba Adolfo Picáns, director financeiro das Bodegas Granbazán, dende as que se botou man do equipo de traballo de traballo de Amicos, formado na súa maioría por persoas con discapacidade intelectual e autismo especializadas en achegar servizos de conservación de montes, parcelas rurais e xardíns.
Dende Grabanzán indican tamén que o máis importante para eles é “poder dar unha oportunidade ás persoas con discapacidade” e o feito de que a actuación sexa “nun sitio tan relevante aínda o fai máis especial”. E engaden: “Estamos moi contentos coa forma de traballar da Asociación Amicos”, indicaban Adolfo Picáns e Carina Vázquez (responsábel de Enoturismo de Granbazán), explicando que elixiron a Ecobrigada e non unha empresa convencional polo seu importante valor social, que tamén vai en consonancia cos valores de RSC, calidade humana e familia que ten a Bodega.
Dende o equipo da Ecobrigada, aínda que acaban de comezar, están moi contentos: “É un gran reto a rehabilitación deste espazo, xa que ten unha manchea de especies vexetais diversas cun gran valor” así contaba a súa experiencia Carlos Vázquez, capataz da Ecobrigada deste equipo. A brigada desta actuación está constituída por un capataz e tres peóns forestais con discapacidade en risco de exclusión social.
