A plataforma Stop Deshaucios Barbanza que coordina José Manuel Pena vén de poñernos ao tanto de dous novos casos de familias da nosa contorna en perigo de quedar na rúa. Trátase en primeiro lugar dunha familia en situación de vulnerabilidade de Cambados, que está a solicitar ao Banco Sabadell a posibilidade de seguir na súa vivenda habitual. O fogar en cuestión está constituído por un matrimonio de avanzada idade, con escasos recursos. A plataforma interveu negociando o establecemento da renda mensual axeitada e xusta así como a propia duración do arrendamento.
Por outra banda, unha familia de Noia recibiu unha cédula de emprazamento do Xulgado número 1 a localidade polo cal se insta un desafiuzamento por orde do grupo inmobiliario Global Pantelaria S.A. A familia solicitou a asistencia xurídica gratuíta para oporse á reclamación xudicial e poder seguir na vivenda. Desde a plataforma Stop Deshaucios Barbanza preténdese instar o grupo inmobiliario, actual propietario do inmóbel que antes estaba en poder dunha entidade financeira, a suspensión do procedemento e o poder negociar unha moratoria ou un aluguer social.
