Esta fin de semana (o domingo) levouse a cabo a primeira das andainas de Outes convocadas esta tempada polo Concello para dar a coñecer á veciñanza e aos visitantes o rico patrimonio local. A ruta deste domingo (Historia e espiritualidade en Roo) foi un éxito de participación (de feito as prazas dispoñíbeis, limitadas por mor da crise sanitaria, esgotáronse ao pouco de ser convocado o itinerario).
A ruta, que tivo o punto de partida ás 10.00 dende a Igrexa de Roo (con seis quilómetros de percorrido), formou parte da iniciativa Camiñando o noso patrimonio, que sae de partida con tres percordidos abertos á participación de residentes e visitantes.
A segunda proposta, Camiñando cara a orixe do concello de Outes, será o 16 de maio, con saída da Eira do Carme (Brión de Arriba) ás 9.00 horas. Serán 9 quilómetros de camiñada, con dificultade moderada.
A terceira andaina, A Torre dos Muros e Fervenzas de San Paio, está programada para o 30 de maio. Será ás 10.00 horas, con saída na Igrexa de San Lourenzo. A distancia a percorrer é de 6,3 quilómetros (dificultade moderada).
As prazas por quedada serán limitadas: 25 por cada ruta.
