Preséntase na Pobra o libro Memorias dunha estrela sen luz, de Andy da Fonte

Adscrita á programación posta en marcha pola Concellaría da Cultura da Pobra do Caramiñal con motivo do Día das Letras Galegas, este 28 de maio celebrarase na localidade a presentación do libro Memorias dunha estrela sen luz, da poeta e activista local Andy da Fonte. Será no teatro cine Elma, ás 20.30 horas, en colaboración coa A. C. Barbantia e La Voz de Galicia.

Intervirán, ademais da propia autora, a concelleira da Cultura, Patricia Lojo (PSdeG-PSOE); o presidente da A. C. Barbantia, Manuel Cartea; e o escritor Antón Riveiro Coello.

A vertente musical do evento virá da man de Mallou, formado por Sabela King e Benjamín Vázquez.

Seguiranse as medidas implantadas por mor da COVID-19, polo cal as persoas interesadas en asistir deben realizar a súa reserva a través do teléfono de contacto 981 831 545.