O 28 de maio levarase a cabo a segunda edición do curso de primeiros auxilios na Pobra

O 28 de maio levarase a cabo a segunda edición do curso de primeiros auxilios en Pobra do Caramiñal, organizado pola Concellaría do Desenvolvemento Local e a Escola Galega de Saúde para Cidadáns. As clases impartiranse na Casa da Mocidade, das 10:00 ás 14:00 horas.

Segundo a edil Amparo Cerecedo, “repítese esta acción formativa dada a boa acollida que tivo a primeira convocatoria e para cubrir a demanda de persoas solicitantes”. De feito, as prazas xa están cubertas coas persoas interesadas que non entraron na primeira quenda.

O programa ten como obxectivo básico adquirir coñecementos sobre o manexo de situacións que requiran unha actuación de primeiros auxilios, ademais de aclarar dúbidas. Polo tanto, abrangue a atención inicial nas situacións de urxencia máis frecuentes tales como traumatismos, convulsións, crises epilépticas, dificultade respiratoria, dor torácica, queimaduras, perda de coñecemento, diabetes, reaccións alérxicas, picaduras, etc.