Barbanza Arousa lanza a campaña Conserva A Orixe para apoiar a hostalería e promocionar a conserva

A Mancomunidade Barbanza Arousa lanza a campaña “Conserva A Orixe” contando coa participación de conserveiras, establecementos de hostalería e as adegas da IGP Barbanza e Iria. O principal obxectivo da mesma é o relanzamento e apoio ao turismo, a través da posta en valor dos produtos gastronómicos do territorio.

Nesta campaña participarán ao redor de 40 establecementos de hostalería de Barbanza Arousa, nos que se poderán degustar conservas de categoría Premium e os viños das adegas da IGP Barbanza e Iria. Así mesmo, as degustacións tamén terán premio.

A campaña, dirixida ao turista de proximidade e tamén aos propios veciños de Barbanza Arousa, arrinca o vindeiro venres día 28 de maio e o xoves día 27 presentarase a prensa as datas, condicións de participación e os premios que conleva dita campaña.