A Mancomunidade Barbanza Arousa (a fronte turística impulsada polos Concellos de Ribeira, A Pobra do Caramiñal, Boiro e Rianxo) fixo balance da súa participación en FITUR, a feira turística máis importante do ámbito estatal clausurada este domingo, e os resultados foron ben positivos. Segundo confirmou a entidade, a presenza de Barbanza Arousa espertou moito interese entre os operadores de turismo nacionais e internacionais, tanto polos produtos que ofrece o noso destino (produtos de natureza e náuticos, culturais, etnográficos, arqueolóxicos ou literarios) como polo seu carácter de punto de encontro sustentábel medioambientalmente e responsábel en materia de seguridade sanitaria.
En concreto, a mancomunidade presentou o seu itinerario turístico xacobeo marítimo-terrestre (O Camiño A Orixe, recentemente oficializado e que, tal e como se lembrou en FITUR, xa permite obter a Compostela) e mantivo xuntanzas cos principais operadores de turismo a nivel nacional e internacional para presentar os diferentes produtos que ofrece este destino. Nestas reunións puxéronse sobre a mesa os produtos de Barbanza Arousa e os segmentos de mercado actuais e potenciais como son o familiar, o de parellas e o de pequenos grupos de amigos; ademais daqueles máis específicos como os de turistas culturais e os de navegantes, “posto que nos atopamos nunha ría cunhas inmellorábeis características para a navegación”, confirmou a mancomunidade.
A Orixe
Segundo fixeron saber os nosos concellos en FITUR, A Orixe é unha ruta xacobea dividida en seis etapas que transcorre polo catro municipios de Barbanza Arousa; Ribeira, A Pobra do Caramiñal, Boiro e Rianxo; amais de “ser un produto de gran singularidade e apto para diferentes públicos, incluído o familiar, pola súa baixa dificultade no seu percorrido”.
A mancomunidade tamén enxalzou no salón madrileño as interesantes opcións da Serra do Barbanza para o sendeirismo, as súas rutas literarias, os seus centros históricos e os deportes acuáticos, entre outras propostas de interese para a súa comercialización.
Con varios acordos pendentes de terminar de perfilar, Barbanza Arousa aborda a comercialización de todos os seus produtos nos próximos meses como destino de litoral sustentábel.
