O Concello de Outes, co fin de dar a coñecer os seus moitos tesouros culturais, paisaxísticos e ambientais (ao tempo que promove os hábitos sociais e turísticos saudábeis e sustentábeis), vén de impulsar a iniciativa Camiñando o noso patrimonio, que sae de partida con tres andainas abertas á participación de residentes e visitantes.
O prazo de inscrición para a primeira camiñada, Historia e espiritualidade en Roo, abriu este luns 26 e remata este 30 de abril, podendo formalizarse na Casa da Cultura ou a través do teléfono 981 850 950. Celebrarase o 2 de maio, a partir das 10.00 horas e con saída da Igrexa de Roo. Serán seis quilómetros de percorrido presentando dificultade moderada.
A segunda ruta, Camiñando cara a orixe do concello de Outes, será o 16 de maio, con saída da Eira do Carme (Brión de Arriba) ás 9.00 horas. Serán 9 quilómetros de camiñada, con dificultade moderada.
A terceira andaina, A Torre dos Muros e Fervenzas de San Paio, está programada para o 30 de maio. Será ás 10.00 horas, con saída na Igrexa de San Lourenzo. A distancia a percorrer é de 6,3 quilómetros (dificultade moderada).
As prazas por quedada serán limitadas: 25 por cada ruta.
