O Concello da Pobra do Caramiñal pon en marcha dous novos programas, que se encontran adscritos á Concellaría dos Servizos Sociais.
No pleno extraordinario do xoves, 29 de abril, falarase do crédito extraordinario ofertado para realizar ditas iniciativas. Así o expuxo a edil Amparo Cerecedo, acompañada da educadora familiar do Concello, Lidia Martínez. Segundo a concelleira, “ámbolos programas se estenderán ao longo deste 2021 e versarán sobre apoio, acompañamento e atención familiar en contornos de risco”.
Dunha banda, a Fundación Meniños desenvolverá un proxecto de atención familiar en contornos de risco, enfocado ao coidado das persoas menores de idade. Desta forma, traballarán con entre 8 e 10 familias e o equipo estará integrado por un educador social especializado en trauma.
O outro programa será levado a cabo por Enraizando e focalizarase no acompañamento individual/familiar, concretamente naquelas persoas con trastorno mental grave e patoloxía dual. Nesta liña, ofrecerán atención psicosocial domiciliaria e apoio comunitario para permitir que as persoas poidan cubrir as súas necesidades no seu propio contorno e contexto. O equipo estará conformado por dous educadores sociais e una psicóloga, que atenderán ao redor de 10 usuarios.
