Ecoplas Barbanza, empresa da Pobra centrada (dende 2006) na fabricación de produtos avanzados para o envasado de marisco e produtos hortofrutícolas, vén de compartir os seus últimos e relevantes avances en materia de economía circular aplicada ao packaging alimentario, un ámbito no que a empresa da nosa comarca é un referente estatal e internacional. Segundo fai saber Ecoplas Barbanza, esta aposta polo sustentábel materialízase a través dunha manchea de proxectos activos de I+D, entre os que se contan Ecobionet, Biovege, Vegepack e Bialac.
A empresa da Pobra explica que a economía circular é “un modelo de produción e consumo que implica compartir, alugar, reutilizar, reparar, renovar e reciclar materiais e produtos existentes todas as veces que sexa posíbel para xerar un valor engadido”. Estes conceptos, engade Ecoplas, “convertéronse nos alicerces para continuar na senda do crecemento e o desenvolvemento da compañía”. Nun plano máis concreto, esta folla de ruta colleu corpo nos seguintes fitos de desenvolvemento: a eliminación de caixas de cartón no packaging, o enfardado de palets con filme fabricado con nanotecnoloxía, o desenvolvemento de bobinas de 1.500 metros e full palets, a redución do peso do canuto interior nun 50%, o emprego de canutos de plástico reciclado ou a reutilización de canutos interiores de malla.
Os produtos que fabrica Ecoplas axudan a diminuír a pegada de CO2 da parcela de transporte e do consumo de materias primas. Amais, “todos os procesos están optimizados para ter o menor consumo enerxético, explican fontes da empresa”, engadindo que a maiores dispón de instalacións de placas solares que producen a enerxía que utiliza nos seus procesos de fabricación e por tanto, o seu consumo de enerxía procede de fontes de enerxías renovábeis.
