Esta semana comezaron en Outes as actividades formativas do programa local universitario para persoas maiores, organizado pola Universidade de Santiago e mailo Concello (a través do seu Centro Social). Trátase dunha iniciativa para veciñas e veciños de máis de 50 anos, destinada a incrementar os seus coñecementos e a súa autonomía, amais de favorecer hábitos activos de aprendizaxe.
Como dixemos, o programa é unha iniciativa conxunta entre o Goberno local e a Universidade de Santiago de Compostela. Inclúe tres seminarios e dúas visitas ao Campus compostelán.
Este 5 de abril celebrouse o curso Revisando a historia dende unha perspectiva local, da man de Raúl Soutelo, doutor en Ciencias da Educación e profesor do Departamento de Pedagoxía e Didáctica da USC.
O seguinte seminario xira arredor da arte e as técnicas teatrais, trátase do obradoiro A construción da personaxe, que se desenvolve até hoxe, 7 de abril, en horario de 16.30 a 18.00. É impartido por Beatriz Porrúa Refojo, pedagoga e colaboradora do programa universitaria de maiores da USC.
A continuación, este xoves 8 de abril, celebrarase o seminario Envellecemento saudábel, en horario de 16.30 a 18.00 horas. Imparte Víctor M. Arce, profesor titular de Fisioloxía, da Facultade de Medicina da USC.
Polo que se refire ás visitas, está prevista unha excursión á Facultade de Medicina de Santiago o día 9 de abril, con hora de saída do Centro Social de Outes ás 16.30 horas e contando coa presenza do doutor José Manuel Fernández García, colaborador do Programa Universitario para Maiores.
A seguinte visita será ao Museo Pedagóxico de Galicia, tamén en Santiago, o 16 de abril, con saída ás 16.30 horas do Centro Social de Outes. Guiará Raúl Soutelo Vázquez, profesor do Departamento de Pedagoxía e Didáctica da USC.