Os operarios municipais da Pobra do Caramiñal comezaron, o 19 de abril, as obras para a substitución da tubaxe de auga nas Leiras Pulpeiro, algo que anunciou a Concellaría dos Servizos Municipais do Concello. A edil Estefanía Ramos (Nós Pobra) afirmou que se trata dunha actuación “moi demandada” pola veciñanza debido ao seu actual estado.
A intervención renovará as recentes roturas na tubaxe desta vía a través da apertura da gabia, a substitución da tubaxe antiga de fibrocemento dun diámetro de 100 mm por unha nova de PVC, así como a reposición total do pavimento de toda a rúa.
A obra está coordinada entre a empresa concesionaria do servizo de augas, Viaqua, que se fará cargo do custo da nova tubaxe de PVC e da súa substitución, e tamén do Concello, que correrá co gasto da apertura da gabia e reposición do pavimento, tarefas contratadas á empresa Excavaciones Nima, S.L, cun investimento de 8.518’28 euros.
