Pechada unha aula no Grupo de Ribeira. Permanecen tamén pechadas outra de Frións e outra en Palmeira

O brote de covid detectado no centro de infantil e primaria O Grupo de Ribeira manten aínda activos cinco casos. Un dos últimos enfermos obrigou a pechar esta semana unha aula neste colexio ribeirense, e poñer en corentena a todos os alumnos e profesores que tiveron contacto coa persoa infectada.
Esta é a segunda clase que queda sen actividade neste colexio por culpa deste brote que afectou tanto a alumnos como a profesores. Tamén permanecen pechadas unha aula no colexio de Frións, onde apareceu un positivo, e outra no CEIP de Palmeira, onde o número de enfermos ascende a dous.

En Ribeira hai outra persoa con covid no instituto Leliadoura, polo que a cifra total de contaxiados vinculados a centros educativos no municipio ascende a nove dos 15 que hai en toda a comarca de Barbanza.

No resto de concellos hai un caso na Pobra e Porto do Son, mentres que en Boiro e Noia hai dous.