O Concello de Outes vai organizar, a través do seu Centro Social, un programa formativo gratuíto para maiores de 50 anos, co fin de incrementar os seus coñecementos e a súa autonomía e favorecer hábitos activos de aprendizaxe. As persoas interesadas deben anotarse no Centro Social ou no teléfono 981 850 575. O programa é unha iniciativa conxunta entre o Goberno local e a Universidade de Santiago de Compostela. Inclúe tres seminarios e dúas visitas ao Campus compostelán.
Polo que se refire aos seminarios, comezan o 5 de abril coa actividade Revisando a historia dende unha perspectiva local. Será en horario de 16.30 a 18.00 horas e virá da man de Raúl Soutelo, doutor en Ciencias da Educación e profesor do Departamento de Pedagoxía e Didáctica da USC.
O seguinte seminario xirará arredor da arte e as técnicas teatrais, trátase do obradoiro A construción da personaxe, que se desenvolve entre os días 6 e 7 de abril en horario de 16.30 a 18.00 horas. Será impartido por Beatriz Porrúa Refojo, pedagoga e colaboradora do programa universitaria de maiores da USC.
A continuación, o 8 de abril, celebrarase o seminario Envellecemento saudable, en horario de 16.30 a 18.00 horas. Imparte Víctor M. Arce, profesor titular de Fisioloxía, da Facultade de Medicina da USC.
Polo que se refire ás visitas, está prevista unha excursión á Facultade de Medicina de Santiago o día 9 de abril, con hora de saída do Centro Social de Outes ás 16.30 horas e contando coa presenza do doutor José Manuel Fernández García, colaborador do Programa Universitario para Maiores.
A seguinte visita será ao Museo Pedagóxico de Galicia, tamén en Santiago, o 16 de abril, con saída ás 16.30 horas do Centro Social de Outes. Guiará Raúl Soutelo Vázquez, profesor do Departamento de Pedagoxía e Didáctica da USC.
