En Outes os centros docentes conmemoran o Día da Muller con actividades creativas

O Concello de Outes está a celebrar cunha relevante axenda de actividades o Día Internacional da Muller, achegando un programa seguro, participativo e libre de posíbeis contaxios. Leváronse a cabo ao abeiro da campaña Camiña cara á igualdade sen violencia de xénero. Dentro desta iniciativa impulsáronse dous certames creativos nos colexios, a desenvolver en formato online: Contos vellos novos finais (dispoñíbel para o CEIP Plurilingüe de Outes, dende o día 8 ao 12 de marzo) e Micromachista eu? (dispoñíbel para os rapaces e rapazas do IES Poeta Añón, dende este luns 8 de marzo até o venres 12).

As ligazóns de ambas actividades estarán abertas ao público en xeral na páxina web do Concello de Outes e máis no Facebook municipal os días 11 e 12 de marzo.

A maiores, o Concello sumouse á campaña OitoM que promove a Área de Igualdade da Deputación da Coruña.