A área de Cultura de Noia achegou esta semana detalles da edición número XX do histórico e prestixioso Certame Literario Relato de Aventuras Antón Avilés de Taramancos. O concurso (que leva o nome dun dos grandes poetas da literatura galega de todos os tempos, natural de Noia) foi presentado polo Concello como un oportuno convite a deixar voar a nosa imaxinación, dende sempre un factor determinante para “combater adversidades”, incluídas a actuais. O certame vén cun premio de 3.000 euros ademais dunha escultura conmemorativa do artista noiés Alfonso Costa e a publicación da obra gañadora por parte do Concello de Noia. 🏆
Poderán concorrer ao Certame de Relato de Aventuras todas as persoas, maiores de idade, de calquera nacionalidade, cun único traballo en galego de temática libre que sexa inédito, encadrado no relato de aventuras.
O prazo de admisión dos orixinais rematará o 15 de setembro de 2021.
A área noiesa de Cultura, para as persoas que estean interesadas en participar, lembra que están dispoñíbeis as bases do certame no seu Facebook.
