Programa GALP: unha gran axuda para potenciar o sector pesqueiro e turístico da localidade

O GALP Costa Sostible afronta o final do seu programa de axudas, que está aberto ata o 1 de marzo. A entidade dispón de case 900.000 euros para desenvolver actividades que teñan que ver co sector pesqueiro.

O programa tivo unha incidencia directa dende o seu arranque, pois os proxectos financiados crearon 83 postos de emprego e destes, case a metade (36) foron ocupados por mulleres. Nesta convocatoria é favorábel que se fagan as propostas relativas ao sector pesqueiro antes do peche da convocatoria. De feito, este é o primeiro obxectivo estratéxico.

A iniciativa tamén persegue fomentar un ámbito pesqueiro máis sostible a través da mellora na xestión dos recursos e do incremento do valor engadido, así como da diversificación e da innovación dos estadios da cadea de valor que se vinculan á transformación, distribución e comercialización.

A entidade supramunicipal xa apoiara nos últimos anos proxectos referentes aos produtos marítimos como a marca Azul de Portosín ou o Polbo da Lonxa, ambos destinados a fomentar e reivindicar o consumo de varios tipos de peixe.

Doutra banda, as subvencións que proporcionou GALP permitiron crear e expandir empresas. Un exemplo é Mariscos Antón, en Muros, que ten contratados a máis de 50 traballadores.

Cabe mencionar que todo isto é de gran importancia para potenciar o turismo do territorio e a ría de Muros e Noia. Así, creáronse numerosas iniciativas vinculadas a este sector e naceron compañías como o Hotel do Porto de Muros.