O Concello de Rianxo e Aquafit poñen a disposición da cidadanía unha aplicación para adestrar dende a casa

O Concello de Rianxo e a Piscina Municipal, xestionada por Aquafit, chegaron a un novo acordo para achegar á veciñanza unha aplicación móbil que permitirá ás usuarias e usuarios da piscina seguir coa súa actividade física e co seu adestramento mentres fiquen pechadas as instalacións deportivas (por mor da situación sanitaria actual e das restricións emitidas polo Goberno galego). A app xa foi posta a disposición da cidadanía con anterioridade, coincidindo co estado de alarma que comezou en marzo do ano pasado.

Na aplicación, que é de balde, subminístrase unha chea de clases en directo e virtuais que se poden realizar desde casa e cando se queira. O obxectivo é o mesmo que o do confinamento da pasada primavera: facilitar o acceso á práctica deportiva e o mantemento dun bo estado de forma física, pese ás restricións que limitan a práctica deportiva.

Para comezar a usar a ferramenta só hai que rexistrarse na páxina web beone.es/behome, obter as claves de acceso e empezar a gozar dunha vida activa e manterse en forma desde casa.