O pasado 28 de xaneiro comezou a funcionar en Rianxo un servizo de reparto a domicilio para axudar ao tecido hostaleiro no grave contexto de crise económica e sanitaria actual e permitir aos establecementos, aínda que sexa dunha maneira básica e limitada, proseguir coa súa actividade. O servizo Rianxo na túa Porta, impulsado pola plataforma local Mercarianxo e outros establecementos e negocios locais, superou as súas dúas primeiras fin de semana de actividade cun éxito total de participación e implicación da cidadanía. Sen ir máis lonxe, esta finde que vimos de deixar atrás comezou coa incorporación de dous novos establecementos, o Curral do Marqués e o Bar Nova Era. Mercarianxo habilitou unha ligazón para achegar ás veciñas e veciños todos os datos dispoñíbeis.
O servizo, que ten o obxectivo de acurtar as distancias entre as empresas locais e os seus clientes, e facéndoo “de xeito seguro e controlado, está a disposición das empresas rianxeiras e dos particulares que queiran recibir deste xeito cómodo as súas compras, pedidos dun restaurante ou calquera outro recado no propio fogar.
Para contactar, as persoas interesadas poden chamar ou escribir por Whatsapp ao 633 835 911, ou ben enviar unha mensaxe ao correo electrónico rianxonatuaporta@gmail.com sen compromiso.