O Concello de Outes vai realizar un concurso de disfraces de Entroido online, xa que é imposible facelo doutra maneira por mor das restricións sanitarias e as medidas actuais.
Os participantes deberán estar empadroados no Concello de Outes e poderán presentarse de forma individual ou en grupo de conviventes. O obxectivo consiste en disfrazarse e sacar unha foto.
O xurado será designado polo Concello e terá unha composición de cinco empregados/as públicos/as. Haberá 3 premios que consistirán en bonos para gastar no comercio local do municipio. O primeiro será de 150 euros. O segundo premio terá un valor de 100 euros e o último de 50 euros.
A fotografía terá que enviarse ao correo electrónico informaticos@outes.gal ou ser entregada no rexistro xeral do concello. O prazo para participar remata o 14 de febreiro.