A hostalería da comarca xunta forzas e estuda medidas de choque contra os gobernos central e galego

O sector da hostalería da comarca leva un tempo fortalecendo os seus vínculos, compartindo unha forza común contra a adversidade da pandemia e actuando, de facto, coma unha asociación da hostalería dos sete concellos (A Pobra do Caramiñal, Boiro, Lousame, Noia, Porto do Son, Rianxo e Ribeira). Este firme sentimento de unión vén de coller novas forzas esta semana, cunhas medidas de relaxamento das restricións anti-COVID que non inclúen finalmente a apertura dos establecementos, o que consideran a estocada final á súa posibilidade de sobrevivir.

O resultado disto é unha situación na que as propietarias e propietarios dos establecementos dos sete concellos recoñecen atoparse estudando a viabilidade de demandar á Xunta e ao Goberno central por estas medidas que consideran tan prexudiciais, co agravante de “ter sido mantidas durante tanto tempo”. O sector comarcal di que o feito de que non se incorpore a hostalería nas medidas de relaxación é “a pinga que reborda o vaso”, polo que piden de urxencia medidas reais e contundentes para impedir o afundimento definitivo da hostalería.

Segundo explicaron a este medio de comunicación os impulsores da iniciativa, o que se pide “non é complicado de entender”, e só hai que remontarse ao que ocorreu na costa galega xusto despois do afundimento do Prestige, unha catástrofe natural e económica que chegou a afectar a máis de 350.000 persoas e que, polo tanto, fixo que se mobilizarán axudas e recursos para armadores, buques e mariñeiros, non só para os mariñeiros. “A diferencia fundamental”, coméntanos Roi Fresco dende Ribeira, responsable actual do Bar Pequeño (Corrubedo), “é que agora só cobran os mariñeiros”. Roi tamén estima en 300 o número de establecementos que están a alzar a súa voz na comarca contra as actuais restricións e a súa prolongación no tempo, unhas restricións que non sei viron parellas, sosteñen, de medidas reais que paliasen o sufrimento das empresarias e empresarios do sector.

Por estas e outras razóns, xa anunciaron que van participar nas mobilizacións programadas os días vindeiros pola Federación Galega de Hostalería en Compostela e outras entidades, comezando pola que está fixada para o 24 de febreiro en cada concello de Galicia e incluíndo tamén a convocatoria do 13 de marzo en Santiago.

O traballo de colaboración ante a adversidade que está a desenvolver este colectivo no Barbanza (materializado principalmente a través da rede Whatsapp) sería o xermolo dunha futura asociación comarcal plenamente constituída, iniciativa que non desbotan impulsar.