Outes entregou os premios do concurso O noso Nadal

O concurso O noso Nadal, promovido polo Concello de Outes coa intención de espallar a creatividade e o uso do galego mediante microrrelatos e postais de Nadal, deu a coñecer este mércores 30 os seus gañadores. Kiara Pastoriza, Pepa Nieto, e Romina Camaño foron galardoadas na categoría de postais, e Antón Nieto, Ángela Lago e Emilio Vázquez recibiron o premio polos seus microrrelatos.

Deste xeito, o concurso posto en marcha dende o Servizo de Normalización Lingüística permitiu ós máis cativos e máis adultos dar pé a súa creatividade e imaxinación, para converter esta iniciativa nunha actividade interxeracional.

Tódolos gañadores recibiron un lote de produtos e libros en galego como premio e nas categorías superiores repartíronse 300 euros en bonos para gastar no comercio outense. Ademais, todas as postais serán expostas na Casa da Cultura da Serra de Outes.