O Concello de Outes puxo en marcha un certame para dar impulso ao uso de galego ao tempo que se estimula o talento creativo da veciñanza, poñendo o foco na xente nova (aínda que se convoca a cidadáns de todas as idades) e garantindo, ao mesmo tempo, a seguridade sanitaria nestes complexos tempos da COVID-19. Trátase do concurso de microrrelatos e postais O Noso Nadal, habilitado polo Servizo de Normalización Lingüística do Concello.
O alcalde de Outes, Manuel González, explicou que mediante o concurso preténdese “favorecer a creatividade entre os máis cativos da casa pero tamén entre a xente adulta”, pois hai diferentes categorías que abranguen a toda a poboación. González López lanzou un convite xeral á participación, pois “haberá algúns obsequios e máis de 300€ en premios que se poderán gastar no comercio local”. Con esta medida, engadiu, “pretendemos fomentar o consumo local e tamén seguir contribuíndo a que as compras do Nadal se fagan no comercio de proximidade”.
Pola súa banda, o técnico de normalización lingüística, Luís Pérez Barral, debullou as bases e o obxecto do concurso, no que “ademais de promover o uso do galego entre a poboación en xeral, e entre a mocidade e a infancia, en particular, preténdese involucrar aos pais, nais, avós e avoas para que sexa unha actividade interxeracional”.
En relación ao contido das bases, desde o SNL indicaron que no concurso de postais poderá presentarse un máximo de 2 traballos, cunha mensaxe en galego dun máximo 50 palabras e dividido en tres categorías; 1ª até sete anos, 2ª de oito a once e a 3ª de 12 anos en diante. No caso do concurso de microrrelatos, cada persoa poderá contribuír cun único traballo en lingua galega que terá un máximo de 250 palabras e dividido en dúas categorías; 1ª até 11 anos e 2ª de 12 anos en diante.
As persoas interesadas poderán entregar os traballos na Casa da Cultura da Serra de Outes até o 22 de decembro.
