O delegado da Xunta na Coruña, Gonzalo Trenor, comprobou este mércores 16 unha das actuacións desenvolvidas na nosa comarca en materia de posta a punto de infraestruturas turísticas. Trátase da sinalización dos recursos naturais e patrimoniais vencellados ás rutas existentes no concello de Outes, unha actuación que contou cunha achega da Xunta (máis de 25.000 euros) e do Goberno local e que tivo un custe de case 39.000 euros.
Na visita a Outes o representante do Goberno autonómico informou que cinco concellos da comarca do Barbanza e a Mancomunidade Arousa Norte foron os beneficiarios das achegas que o Goberno galego reserva para impulsar actuacións de posta en valor da riqueza histórica, cultural, patrimonial e paisaxística do rural con máis de 125.000 euros, en 6 obras que mobilizaron máis de 208.000 euros en colaboración coas administracións locais.
Sufragáronse, entre outras, accións, engalanado dos accesos e bens declarados de interese cultural, iluminación ornamental, recuperación e creación de miradoiros paisaxísticos ou recuperación de elementos de interese etnográfico ou da arquitectura tradicional, entre outras, co que “se pretende seguir impulsando Galicia como un destino fiábel e de calidade, potenciando os valores que caracterizan o modelo turístico galego e que cobran especial importancia no contexto actual, como a natureza, a paisaxe a enogastronomía ou o Camiño de Santiago”, dixo o delegado.
Trenor lembrou tamén que este ano a Xunta concedeu axudas por preto de 1,2M€ a 43 concellos galegos e 70 particulares para acometer accións de mellora paisaxística ao longo do Camiño de Santiago. Esta liña de subvencións enmárcase no Plan de Embelecemento da Ruta Xacobea e, en virtude da mesma, o Goberno galego financia o 75% das intervencións propostas polos beneficiarios, entre as que figuran actuacións en elementos que xeren un impacto visual nos distintos itinerarios ou a restauración de bens do patrimonio etnográfico galego.
