Esta semana de Nadal inauguráronse oficialmente os obradoiros de emprego autonómicos que achegarán capacitación a corenta persoas desempregadas ao tempo que realizan traballos de recuperación, rehabilitación e dinamización de espazos e infraestruturas na nosa comarca. Estamos a falar do taller Tanume VI, que se vai desenvolver en Ribeira e Porto do Son, e do máis do obradoiro de xestión forestal que dará formación en xestión forestal a vinte persoas dos concellos de Noia, Lousame e Outes. O primeiro presentouse na Casa da Cultura de Xuño. O segundo activouse oficialmente no antigo Colexio de Cruceiro de Roo.
O obradoiro de Ribeira e Porto do Son
O Obradoiro Tahume VI, financiado pola Consellería de Emprego e Igualdade da Xunta de Galicia, realízase conxuntamente entre os Concellos de Porto do Son e Ribeira. Serán 9 meses de aprendizaxe e capacitación ao abeiro das especialidades de Traballos de carpintería e moble e Actividades auxiliares en conservación e mellora de montes. A subvención conta con 346.946,00€ para os devanditos obxectivos de formación e empregabilidade e 9.000€ para incentivos á contratación. Participan no taller 20 persoas, dez por cada municipio. En Ribeira, os traballos da modalidade forestal concentraranse principalmente en Couso e o monte de San Alberte, a través da repoboación con especies autóctonas; mentres que a especialidade da carpintería desenvolverá o proxecto de recuperación de pasarelas nos areais ou a elaboración de pasamáns para a praia da Corna. No caso de Porto do Son, a carpintería permitirá repasar moitas das pasarelas que se distribúen ao longo dos seus quilómetros de litoral, así como a construción de mobiliario urbano como por exemplo bancos ou macetas, entre outros.
O obradoiro de Outes, Noia e Lousame
O antigo Colexio de Cruceiro de Roo acolleu o inicio das actividades do obradoiro de xestión forestal que se desenvolve xa nos concellos de Outes, Noia e Lousame. Do mesmo xeito có de Ribeira e O Son, conta con financiamento da Consellería de Emprego e Igualdade. Céntrase en achegar recursos de utilidade sobre conservación e mellora de montes. O taller, concibido para unha vintena de alumnos, ten a súa sede de operacións en Outes. A Xunta contribuíu con 347.000 euros ao seu desenvolvemento, ao que cómpre engadir 16.500 euros para incentivar a contratación en empresas da contorna das persoas participantes.
Durante nove meses o alumnado recibirá a formación teórico-práctica prevista nos certificados de profesionalidade, alternándoa co desenvolvemento de traballos consistentes na mellora de masas arbóreas, rozas, podas ou reforestación. As actividades prácticas levaranse a cabo en diferentes recantos forestais dos tres municipios.
