A Policía Autonómica realizou dispositivos anti-COVID en Ribeira, Boiro e A Pobra

Axentes da Policía Autonómica levaron a cabo, durante esta fin de semana do 18 ao 20 de decembro, 32 dispositivos na provincia da Coruña no marco do plan de actuacións específicas destinadas á prevención, inspección e control do cumprimento das medidas adoptadas polas autoridades competentes pola COVID-19. Ao abeiro destes controis, os axentes realizaron 63 inspeccións en 12 concellos da provincia na pasada fin de semana, entre os que se incluíron Boiro, A Pobra do Caramiñal e Ribeira. Saldáronse coa identificación de 25 persoas e a tramitación de 27 actas de infracción.

Os dispositivos tamén cubriron Arteixo, Carballo, A Coruña, Ferrol, A Laracha, Narón, As Pontes, Santiago de Compostela e Teo.

No conxunto da comunidade galega, os axentes actuaron en 126 dispositivos en 43 municipios cun total de 250 inspeccións, con máis de 226 persoas identificadas e 65 denuncias tramitadas.

Durante os operativos, os axentes controlaron que nos establecementos abertos ao público, terrazas e espectáculos públicos se estaban a cumprir as medidas aprobadas polas autoridades sanitarias para facer fronte á COVID-19, como o uso obrigatorio de máscara, o cumprimento da distancia de seguridade, así como o aforo e o horario de peche dos locais e a prevención do botellón.