A Biblioteca Municipal de Rianxo, ao abeiro do primeiro Foro de Alfombrismo de Galicia, Patrimonio Inmaterial (organizado pola asociación rianxeira Ondiñas Mainas), acollerá este mes e parte do seguinte unha exposición itinerante sobre a tradición alfombrista das nosas vilas e cidades. Poderá visitarse até o 8 de decembro.
A exposición, visitábel partir deste martes 24 no andar baixo da Biblioteca Municipal, inclúe imaxes de creacións previas á chegada da pandemia e imaxes de tapices virtuais feitos durante a crise sanitaria. Tamén se mostran contribucións realizadas polas asociacións que integran a Federación de Alfombristas Galegos de Arte Efémera (FAGAARTE) con motivo da celebración do Corpus deste ano.
