Emilio Vázquez Fernández, natural de Compostela e afincado en Boiro, vai presentar este venres en Ribeira a súa estrea no ámbito editorial: o libro 50 anos de mentiras, unha obra editada por Letrame que supón o debut literario do santiagués e, en palabras do propio autor “un soño da adolescencia finalmente cumprido”. No acto, que se vai desenvolver no Centro Cultural Lustres Rivas a partir das 20.00 horas, estarán presentes, acompañando a Emilio Vázquez, a tenente alcalde de Ribeira, María José Sampedro Fernández, e, Alicia Padín Otero, responsábel da área de Normalización Lingüística do Concello.
O autor, nacido no ano 1969, é funcionario como axente do SVA desde o ano 2005. Durante a súa mocidade cursou estudos de Náutica e comezou a sentir devoción pola escritura, pese a que é agora cando cumpre o seu soño de publicar un libro. Asegura ser un apaixonado da historia, a arte e, sobre todo, un namorado da súa familia: a súa muller e filla.
Segundo fai saber, 50 anos de mentiras naceu como “unha válvula de escape” durante o confinamento, “unha etapa complicada a nivel emocional” que lle concedeu, malia adversidade, “unha sensibilidade á hora de escribir”. O libro, que transcende calquera xénero ou formato no que queiramos incluílo, contén poemas e relatos en prosa, ademais de reflexións e observacións sobre distintos aspectos da vida e a natura humana, así como o pensamento persoal do autor en problemas sociais.
