A Casa da Cultura Raquel Fernández Soler, na Pobra do Caramiñal, acollerá este mes de setembro (do día 10 ao 30) unha nova exposición titulada Lembranzas da miña infancia. Esta mostra do coleccionista Santiago Vázquez atópase formada por máis dunha centena de xoguetes Playmobil escenificados.
Segundo informa o Concello, a maioría das pezas datan da década de 1970 e clasifícanse en diversas temáticas: bélica, época vitoriana ou contemporánea, entre outras. O Concello tamén salienta que algúns dos elementos son “exclusivos ao estaren feitos e pintados á man”.
O obxectivo da instalación é, en palabras do autor, “transmitir ás xeracións máis novas como xogaban as persoas da súa idade, cando non existía tanta tecnoloxía aplicada ao ocio”. Tamén pon o foco o autor na importancia de que as e os proxenitores pasen tempo de lecer coas súas crianzas e, segundo as súas palabras, “os Playmobil constitúen unha boa maneira de xogaren en conxunto grandes e pequenos/as”. As visitas pódense realizar de luns a venres, en horario de 10.00 a 13.30 e de 18.30 a 20.30 horas.
