A mocidade na comarca do BNG, o colectivo Galiza Nova, denunciou este primeiro de xullo un ataque LGBTfóbico na Pobra do Caramiñal, onde o mural realizado hai uns anos pola agrupación, con motivo do Orgullo, foi atacado nun xesto de “vandalismo e profunda intolerancia”, co agravante de que coincide no tempo coa celebración do Día Internacional pola Diversidade (este 28 de xuño) e das actividades de reivindicación que se están a levar a cabo en todos os nosos concellos.
Segundo a responsábel comarcal da organización, Diana Lixó, “as persoas LGBT enfrontámonos a agresións constantes diariamente, dende brincadeiras ‘inocentes’ ata ataques directos desde organizacións e institucións”. Lixó engadiu que ante este grave problema de intolerancia, do que o suceso da Pobra é só un exemplo, é preciso que sexamos activistas durante os 365 de anos, e non só en campañas electorais ou en celebracións puntuais: “Cómpre condenar a actuación de certos grupos políticos coma o Partido Popular ou Ciudadanos neste eido, que en días coma o do Orgullo se envolven coa nosa bandeira cando o resto do ano promoven políticas que limitan a nosa liberdade; non precisamos máis pinkwashing desde as institucións”.
As mocidades do BNG consideran necesario promover “unha educación sexual digna nos colexios, que eduque ás nosas crianzas libres de prexuízos moralistas”; e tamén “unha actuación clara contra o bullying que sofren nas escolas as adolescentes LGBT+, que nos casos máis dramáticos remata incluso co suicidio”.
Desde Galiza Nova declaran que “non van permitir a LGBTfobia, polo que animan a toda a mocidade galega a “se organizar para facer fronte a esta, para construír coas nosas propias mans a Galiza da diversidade, a Galiza na que poder sermos libres.”
