A Delegación de Santiago do Colexio Oficial de Arquitectos de Galicia vén de fallar o seu primeiro Premio Arquitectura para un Mundo Mellor, un certame convocado no mes de maio para axudar ás novas xeracións a descubrir a importancia da arquitectura para fomentar e asegurar a calidade de vida na nosa sociedade. Baixo o lema A vivenda ideal, participaron 335 nenos e mozos de ata 18 anos que presentaron un debuxo ou imaxe orixinal, realizado con calquera material ou técnica. Entre as gañadoras estivo Noa Domínguez Diz, da Pobra do Caramiñal, na categoría de até cinco anos. Impúxose co debuxo Casa de cores.
Os restantes galardóns repartíronse entre os concellos de Santiago, A Coruña, Ames, Ferrol e Lugo. O xurado, composto por recoñecidos debuxantes, valorou a expresión gráfica, a orixinalidade e a calidade artística ou dificultade técnica en función da idade, desde os debuxos máis frescos dos infantís até os traballos máis interesantes dos maiores.
A entrega de premios celebrarase en Santiago nos meses de outono, en función da evolución da pandemia da COVID. Na páxina web do certame, podemos consultar a listaxe completa das premiadas e dos premiados.
