O Concello de Boiro e o de Porto do Son vén de comunicar a súa adhesión á campaña Liberdade de Ser e Sentir!, impulsada pola Deputación da Coruña, a través de Políticas de Igualdade, con motivo do Día da Diversidade Sexual que se celebra o vindeiro 28 de xuño. O de Boiro é un dos máis de 50 concellos e entidades que se sumaron á campaña provincial para avanzar na sensibilización e no respecto sobre a igualdade das persoas. Pola nosa comarca, tamén xuntaron forzas na iniciativa os Concellos de Porto do Son, Rianxo, A Pobra do Caramiñal, Noia e Lousame.
Esta iniciativa, que se vai levar a cabo a través das redes sociais, ten como obxectivo ofrecer contidos que fomenten a tolerancia ante diversas orientacións sexuais e identidades. Durante este mes, iranse compartindo a través das comunidades online contidos audiovisuais centrados nos dereitos do colectivo LGTBI+, nos que especialistas e activistas falarán no relativo ao deporte, a infancia e a adolescencia, os medios de comunicación ou a literatura. Todos os contidos poden seguirse durante este mes a través das redes sociais do Concello de Boiro, o cancelo #seresentir ou a web seresentir.gal, que é a páxina propia do programa da Deputación da Coruña.
